chinaveerabhadrudu.in
ఆ తర్వాత వారం రోజులపాటు ప్రతి పాఠశాలా, ప్రతి చిన్నారీ, ప్రతి ఉపాధ్యాయుడూ నాకు మనఃపూర్వకంగా వీడ్కోలు చెప్తూనే ఉన్నారు. అన్నిటికన్నా మరవలేనిది ఆసిఫాబాద్ గురుకులపాఠశాలలో జరిపిన వీడ్కోలు సభ. ఆ రోజు దారిపొడుగునా గులాబీలు పరిచి మరీ నన్ను స్వాగతించారు.
ఆమె మాటలు వింటున్నంతసేపూ నేను పదేపదే ‘నేను ఒంటరిని కాను’, ‘నేను ఒంటరిని కాను’ అని నాకు నేను చెప్పుకుంటూనే వున్నాను. అక్కడెక్కడో కొండకోనల్లో గూడగూడకి, బడిబడికీ తిరుగుతూ నేను మాట్లాడుతున్న మాటల్నే ఇక్కడ ఢిల్లీలో ప్రభుత్వపు విద్యావిధానాన్ని నిర్దేశించే అత్యంత కీలకమైన సంస్ధలో అత్యంత కీలకమైన విద్యావేత్త కూడా మాట్లాడుతుండటం నాకు మానసికంగా, నైతికంగా ఎంతో బలాన్నిచ్చింది.