chinaveerabhadrudu.in
కానీ ఇవాళ అంతమంది యువతీయువకులు సంగీత సరస్వతికి తమ 'స్వాంతమనే సరోజాన్ని సమర్పణ' చేయడానికి అంకిత చిత్తులై కనిపిస్తుంటే నాకు చాలా చాలా సంతోషమనిపించింది. ఆ రాగాల పేరిట, ఆ బందిష్ ల పేరిట వాళ్ళకి ఈ దేశపు ఋతువులు, ఈ దేశపు కవితలు, ఈ దేశపు రంగులు పరిచయమవుతున్నాయి కదా అనిపించింది.
నిన్న సాయంకాలం ఆ సితారు ఆలాపన వింటున్నంతసేపూ నాకు ఒక నది ఒడ్డున కూచున్నట్టూ, నా పాదాలు ఆ నీళ్ళల్లో మునిగీ మునక్కుండా పెట్టుకున్నట్టూ, చిన్ని చిన్ని నీటితరగలు నా పాదాల్ని తాకి విరిగి కిందకి జారిపోతుంటే, నా హృదయంలోపల ఎవరో చేయిపెట్టి మెత్తని సున్నితమైన తంత్రులేవో కెరలిస్తున్నట్టూ అనిపించింది.
సంగీతం వినేప్పుడు నా అనుభూతి కూడా అటువంటిదే. అంతేకాదు, గొప్ప చిత్రలేఖనాలు చూస్తున్నప్పటిలాగా, గొప్ప కావ్యాలు చదువుతున్నప్పటిలాగా, ఆ సంగీతం నాలోని ఏవో పురాస్మృతుల్ని కెరలిస్తుంది. నెమ్మదిగా నేనొక మధుర విస్మృతిలోకి జారుకుంటాను.