chinaveerabhadrudu.in
‘ఇదిగో, ఇదే చలంగారి సమాధి, ఈ మధ్యే మున్సిపాలిటీవాళ్లు రోడ్డు వెడల్పు చేయడంకోసం దీన్ని కొట్టేశారు’ అన్నాడు. అదొక పాడుబడ్డ సిమెంటు కట్టడం. దానిమీద ఆరిపోయిన ప్రమిద ఒకటి ఉంది. ఆ సిమెంటుగోడలు నాచుపట్టి ఉన్నాయి. నాకు విపరీతమైన దుఃఖం ముంచుకొచ్చింది. ఇక్కడ ఈ సమాధి లేకపోతే బావుండేదనిపించింది.
ఆ శిఖరాన్ని అట్లా చూస్తున్నకొద్దీ నాలోపల నా జ్ఞాపకాలలోపల ఎన్నో పొరలకిందనుంచి, ఎన్నో వాసనల, సంస్కారాల తెరలు తప్పించుకుంటూ నెమ్మదిగా ఒక మహాశిఖరం తలెత్తుతున్నట్లుగా అనుభవమైంది. నేనిక్కడికి వచ్చింది ఈ శిఖరాన్ని చూడటంకోసమే, అసలు నన్ను చూడటంకోసమే ఈ శిఖరం నన్నిక్కడికి రప్పించుకుందని నాకు హఠాత్తుగా స్ఫురించింది.