chinaveerabhadrudu.in
సాహిత్యం శక్తిలేనిదని ఎవరన్నారు? టాల్ స్టాయిని చదివిన తర్వాత నాలో వస్తున్న మార్పుని నేను గుర్తిస్తూనే ఉన్నాను. అయితే ఇంకా విశుద్ధమయిన హృదయమున్నవాడూ, నిజాయితీపరుడు ఇంకా ఎక్కువ మార్పు చెందుతాడు. బహుశా గాంధీగారికీ, మనకీ తేడా అక్కడేనేమో.
టాల్ స్టాయి గారు అట్లా నాకు ఏవేవో విశదపరుస్తూనే వున్న్నాడు. బాల్యం యవ్వనం, వృద్ధాప్యం-అన్నీ కలిసి ఆకట్టుకుంటున్నాయి ఆయన్లో. ఒక్కో కథ ఒక్కో విధంగా ఒక ద్వారం.
శ్రమించడం వల్ల మానసిక రుగ్మత నశిస్తుందని నమ్మడంలో- ఇంతవరకూ విప్రతిపత్తి ఏమీ కన్పించడం లేదు. ఆవశ్యకమయిన కర్తవ్యం, దేన్ని నెరవేర్చకపోడం వల్ల యీ బాధంతా కల్గుతోందో, దాన్ని చేపట్టాలన్న నిశ్చయం. కాని, అదేమిటో తెలిస్తే కదా