chinaveerabhadrudu.in
శాఫో, నువ్వు నీ రెండు వాక్యాల్లో రాసిన నలుగులాట మొత్తం ఒక ప్రేమికురాలు తనకై తాను విస్తరించి రాసుకుంటే, అది రేవతీదేవి రాసుకున్న 'అనురాగ దగ్ధ సమాధి' కవిత అవుతుంది. పెద్ద కవిత, కాని ఆ కవిత మొత్తం నీతో పంచుకోకుండా ఉండలేకపోతున్నాను. ఆమె ఇప్పుడు స్వర్గంలోనే ఉండి ఉంటుంది. నువ్వు కబురు చేస్తే తప్పకుండా వచ్చి తనే నీకీ కవిత చదివి వినిపిస్తుంది.
ఒక్క వాక్యం శాఫో- ఈ ఒక్క వాక్యంతో నువ్వు నేనింతదాకా చదివిన మహనీయ సాహిత్య కృతులన్నిటికీ హారతి పట్టి చూపిస్తున్నావు. ఆ వెలుగులో ఆ కావ్యాల్నే కాదు, నీ మంగళమయ వదనాన్ని కూడా చూడగలుగుతున్నాను శాఫో!
నీ దృష్టిలో ప్రేమ ఒక అనుగ్రహం. అది పోరాడి సాధించేది కాదు, పారాడి నిలబెట్టుకునేదీ కాదు. అది నిలువెల్లా వణికిపోతూ, మన చేతుల్లోని కాఠిన్యానికి ఆ శిరీష కుసుమదళాలు ఎక్కడ కందిపోతాయోనన్నంత ఆతృతగా, వినయంగా, మోకరిల్లి మరీ మన జీవితాల్లోకి తెచ్చుకోవలసింది. ..