chinaveerabhadrudu.in
కానీ నీకు లభించిన ఆ ప్రేమకి నువ్వు యోగ్యుడు కావడానికి సాధన చెయ్యాలి. ఒకరోజో, ఒక ఏడాదో కాదు, ప్రతి రోజూ చెయ్యాలి. ఒక రోజు సాధనతో మరొక రోజు స్నేహం నిలబడుతుంది. ఆ మరొకరోజు స్నేహం ఆ తర్వాతి రోజు సాధనకి శక్తినిస్తుంది. స్నేహమంటే, ఎప్పటికప్పుడు నివురులూదుకోవలసిన నిప్పు.
నీ హృదయం ప్రేమతో పొంగిపోయేకొద్దీ నువ్వు నీ ఆర్తిని పంచుకోడానికి ఇలా మాస్టర్స్ కి ఉత్తరాలు రాసుకోడం తప్ప మరో దారిలేదు. ఈ సంగతి అందరికన్నా ఎక్కువగా మన భక్తికవులకు తెలుసనుకుంటాను, అందుకే, అంత ప్రేమ, అంత ఆర్తి, అంత సంపూర్ణ సమర్పణ వాళ్ళ గీతాల్లో.
గొప్ప నాటకకర్తలందరూ చేసిన పని ఇదేననుకుంటాను. ఎందుకంటే, ఆ మనుషులు మనకి తెలియనీ, తెలియకపోనీ, మన వాళ్ళవనీ, కాకపోనీ, వాళ్ల మధ్య intense గా సంభవించేది ఏదైనా సరే మనలోనూ అంతే గాఢమైన సంవేదనని మేల్కొల్పుతుంది. ఎవరి కలకలమైనా మనదే అనిపిస్తుంది, ఎవరి కన్నీళ్ళయినా మనవే అనిపిస్తాయి.