జయగీతాలు-16

సమస్త జనులారా, ప్రభువుని స్తుతించండి

సకలలోకప్రజలారా, ప్రభు మహిమ ఉగ్గడించండి

మనపట్ల ఆయన అనుగ్రహం చెక్కుచెదరనిది

మనపట్ల ఆయన నమ్మకం ఎన్నటికీ తరగనిది.

స్తుతించండి ప్రభువుని నోరారా!

నా దీనావస్థలో ప్రభువుకు మొరపెట్టుకున్నాను

ఆయన నా పిలుపుకు బదులిచ్చాడు

ప్రభూ, బయటపడెయ్యి నన్ను

అబద్ధాలాడే పెదాలనుంచీ

మోసకారి నోటినుంచి.

ఎంత కష్టం నాకు,  ప్రవాసిగా బతకవలసి వచ్చింది

పరాయి వాళ్ళమధ్య గుడారం పాతుకోవలసి వచ్చింది

శాంతిని ద్వేషించే మనుషులమధ్య

చిరకాలమే నివసించవలసి వచ్చింది

నేనేమో శాంతి కోరుకుంటున్నాను

కాని నోరు తెరిచానా, వాళ్ళు కయ్యానికి కాలు దువ్వుతున్నారు.

ఎక్కవలసిన కొండలెన్నో

ఎవరు నాకు చేయందిస్తారు?

ప్రభు హస్తం నాకు ఆసరా

భూదిగంతాల్ని సృజించినవాడాయన.

ప్రభువు నీ కాపరి

నీ కుడిపక్కన పరుచుకున్న నీడ

నిన్ను పగలు ఎండ బాధించదు

రాత్రి వెన్నెల గాయపర్చదు.

ప్రభువు నిన్ను చెడుకు దూరంగా ఉంచుతాడు

నీ బతుకు నిలబెడతాడు

ఇప్పటికీ ఎప్పటికీ

నీ రాకపోకల్ని

తన చేతుల్లోకి తీసుకుంటాడు.

దేవాలయానికి రమ్మని వాళ్ళు పిలిచినప్పుడు

నాకెంతో సంతోషమనిపించింది.

ఓ దైవనగరమా, నీ ద్వారాలదగ్గరకు

చేరుకున్నాయి మా చరణాలు.

దైవనగరక్షేమంకోసం ప్రార్థించండి

నిన్ను ప్రేమించేవాళ్ళకి అభ్యుదయం సిద్ధించు గాక

నీ ప్రాకారాలమధ్య శాంతినెలకొనుగాక

నీ హర్మ్యాలలో క్షేమం సుస్థిరమగుగాక

నా అన్నదమ్ములకోసం, బంధుమిత్రులకోసం

నీ క్షేమం కోరుతూ ప్రార్థిస్తున్నాను

మన ప్రభు దేవాలయకోసం

సర్వదా నీకు శుభం కోరుకుంటాను.

స్వర్గసీమలో సింహాసనాధీశుడవైన

నిన్ను కనులారా దర్శిస్తాను

సేవకులు తమ యజమాని

హస్తం కోసం వెతుక్కున్నట్టు

దాసీజనం తమ యజమానురాలి

అభయం కోసం వెతుక్కున్నట్టు

మన నేత్రాలు మన ప్రభువు, మన దైవం

కృపావీక్షణానికై పరితపిస్తున్నాయి.

మా శక్తికి మించి అవమానాలు సహించాము

గర్విష్ఠుల తృణీకారం రుచిచూసాం.

సుఖంగా జీవితం వెళ్ళబుచ్చుతున్నవాళ్ల

ఈసడింపులు చవిచూసాం

ఇప్పటిదాకా భరించింది ఇంక చాలు,

మాపై కృపచూపు, తండ్రీ, మాపై దయచూపు.