chinaveerabhadrudu.in
ఈ ఫిబ్రవరి నెలని నల్ల జాతి మాసోత్సవంగా జరుపుకుంటున్నారు. ఆ సందర్భంగా ఆఫ్రికన్-అమెరికన్ సాహిత్యం పైన నేను చేస్తున్న ప్రసంగాల్లో ఇది మూడవది. ఈ రోజు విలియం ఎడ్వర్డ్ డుబ్వా గురించి, ఆఫ్రికన్ బానిస గీతాల గురించీ, లాంగ్ స్టన్ హ్యూస్ గురించీ మాట్లాడాను. ఆ ప్రసంగం ఇక్కడ వినొచ్చు.
మా మాష్టారు రాసిన ఒక పద్యంలో 'పునర్యానం' అనే పదం వాడితే, నేనా పదం తీసుకుని ఒక కావ్యం రాసాను. ఆ పుస్తకం ఆవిష్కరిస్తో మా మాష్టారు కవిత్వానికి multiply అయ్యే గుణముంటుందనీ, వాల్మీకి ఎక్కడో బాలకాండలో వాడిన ఒక పదబంధం తీసుకుని కాళిదాసు కుమారసంభవమనే కావ్యం రాసాడనీ అన్నారు.
కవిత్వం కూడా యవ్వనంలాగా, వసంతంలాగా, ఒక జీవితంలో ఒక్కసారి మటుకే వచ్చివాలుతుంది. నిర్మలమైన ప్రేమలాగా, యవ్వనారంభసమయంలోనే సాక్షాత్కరిస్తుంది. కవి అంటే పాతికేళ్ళలోపు, మహా అయితే, ముప్పై ఏళ్ళ లోపు కవిత్వం చెప్పినవాడే, కీట్స్ లాగా, రేంబో లాగా, తోరూదత్ లాగా, మహా ప్రస్థానగీతాలు రాసిన శ్రీ శ్రీ లాగా. ఆ తర్వాత కూడా కవిత్వం రాయొచ్చుగాని, అప్పుడది అయితే వచనమవుతుంది, లేదా ప్రవచనమవుతుంది.
