chinaveerabhadrudu.in
ప్రతి ప్రేమికుడికీ, ప్రేమికురాలికీ ప్లేటో చెప్పినట్టుగా ఒక ఆదర్శమూర్తి మనసులో ఉంటారు. కాని ఆ ఆదర్శమూర్తి పోలికలు అంత స్పష్టంగా గుర్తుపట్టేట్టు ఉండవు. అది చిన్నప్పుడు తప్పిపోయిన మిత్రుడి ఫొటో లాంటింది. ఇక ప్రేమికులు ఎవరిని కలిసినా, ఎవరితో ప్రేమలో పడ్డా, మాటిమాటికీ ఆ ఫొటో తీసి చూసుకుంటూ, ఇతడే కదా, ఈమే కదా అనుకుంటూ ఉంటారు.
ఎదుటిమనిషి సంగతి వదిలిపెట్టు, కనీసం నా మాటలు నాకేనా ప్రాణం పోసేట్టు ఉండాలి. ఎప్పటికప్పుడు నివురు కమ్ముతున్న ఈ జీవితాగ్నిని ప్రజ్వరిల్ల చేసుకునేట్టుగా ఉండాలి. బహుశా అందుకేనేమో, ఈ ఉత్తరాలిట్లా రాసుకుంటున్నది.
అందుకని నీకు నేను చెప్పగలిగే మంత్రం ఇదే, నీ అంతరంగం కలవరపడుతున్నదా, ఇతమిత్థంగా చెప్పలేని ఏ వేదననో లేదా ఉద్వేగమో నిన్ను నిలవనివ్వకుండా అస్థిరపరుస్తోందా, అయితే నువ్వు చెయ్యవలసిన పని, ఉత్తరాలు రాయడం.
