chinaveerabhadrudu.in
భగ్నమైపోయిన ఆ స్నేహాల్ని అలా భగ్నం కాకుండా ఎందుకు కాపాడుకోలేకపోయాం? లేదా ఈ ప్రశ్న మరోలా అడగాలంటే, ఇప్పటికీ, భగ్నం కాకుండా మిగిలి వున్న స్నేహాలు ఎలా మిగలగలిగాయి? బహుశా ఏ ఔషధం సేవించి ఉంటే, ఆ భగ్న స్నేహాలు భగ్నం కాకుండా ఆరోగ్యంగా మిగిలి ఉండేవి?
కానీ ఇద్దరు మనుషులు, వాళ్ళిద్దరూ స్త్రీలే అయినా, వాళ్ళిద్దరూ పురుషులే అయినా కూడా, తమకి తెలియని, తాము అందుకోలేని, తాము గ్రహించలేని ఏ సౌందర్యాన్నో వాళ్ళు పంచుకుంటున్నారని తెలిస్తే సంఘానికి కలిగే అసహనం అంతా ఇంతా కాదు.
వాళ్ళ జీవితాల్లో వాళ్లు చూసిన వెలుగు, వాళ్ళ జీవితాల్ని దహించివేసిన ఒక తపన, లోకాతీతమైన ఏ సౌందర్యమో తమని నిలనివ్వకుండా నడిపించిన ఒక అనంత నీలిమ- వాటిని మళ్లా మన జీవితాల్లోకి వడగట్టుకోవడం. ఎమర్సన్ ఒక ప్రసంగంలో చెప్పినట్టుగా మల్బరీ ఆకులు పట్టు వస్త్రంగా మారే ప్రక్రియ.