చలిగాలి చలిగాలి

జీవితంలో నేను ఎంతమాత్రం అడుగుపెట్టలేకపోయిన లోకం సంగీతం. ఇన్నేళ్ళ జీవితంలోనూ శ్రోతగానే మిగిలాను తప్ప, ఒక పాటకి స్వారాలు కూర్చడమెట్లానో నేర్చుకోలేకపోయాను. దురదృష్టవశాత్తూ గొప్ప గాయనీగాయకులెవరూ నా మిత్రులుగానో లేదా నా ఇరుగుపొరుగులోనో లేకపోయారు. కాని ఇప్పుడు ఆర్టిఫిషియలు ఇంటెల్లిజెన్సు గీతాల్ని గానంగా మారుస్తుందని విన్నాక ప్రయోగాలు మొదలుపెట్టాను. ఇదుగో, ఈ పాట నాలుగేళ్ళ కింద విజయవాడలో ఒక తొలకరి వేళ రాసింది, ఇప్పుడు ఏ.ఐ యాప్ ని అడిగితే ఇలా గానం చేసింది. రెండుమూడు ఉచ్చారణదోషాలున్నాయిగాని, ఇప్పుడు మన తెలుగు సినిమా ప్లేబాక్ సింగర్సు తో పోలిస్తే, ఆ దోషాలు అంతగా పట్టించుకోవలసిన పని లేదనుకున్నాను. ఈ మండుటెండల్లో ఒకసారి విని చూడండి.

తొలివానగాలి
___________

చలిగాలి చలిగాలి తొలివానగాలి ఏ
కొలిమితిత్తుల మంటదో, ఈ
చలిగాలి చలిగాలి తొలివానగాలి.

ఆకసమ్మున మొయిలు బయలుదేరెనొ లేదొ
రాగరంజితమగును పూర్వదుఃఖానలము
వీచుచున్నది గాలి సేదదీర్చుటమాని
రాచుచున్నది ఎడద మరచిపోయిన పాట.

చలిగాలి చలిగాలి పుప్పొడులగాలి ఏ
కొలిమితిత్తులు పూచెనో, ఈ
చలిగాలి చలిగాలి పుప్పొడులగాలి.

కడిమిపూవుల గాలి కెరలించి నా యెదను
అడగిపోయిన దిగులు మరల కికురించినది
కలలు, కోరికలెటకొ తరలిపోయిన వెనక
చెలగి రేగినదేల కరకు కస్తురి గాలి.

చలిగాలి చలిగాలి రంపాల గాలి ఏ
కొలిమితిత్తుల కోతదో, ఈ
చలిగాలి చలిగాలి రంపాల గాలి.

17-5-2025