chinaveerabhadrudu.in
పునర్యానం మొదటి అధ్యాయంలో మొత్తం అయిదు సర్గలు, 102 కవితలు ఉన్నాయి. వాటిల్లో నా చిన్నప్పటి అనుభవాల్నీ, ఆ తర్వాత నేను చూస్తూ వచ్చిన సౌందర్యాన్నీ కవితలుగా మార్చడానికి ప్రయత్నించాను. వాటిల్లోంచి చిన్న కవితలు, అనువాదానికి వీలుగా ఉండే కవితలు మాత్రమే మీతో పంచుకుంటున్నాను. ఆ వరసలో మరొక కవితతో, ఆ అధ్యాయాన్ని ముగిస్తున్నాను.
ఈ కవితలో 'పువ్వు నుంచి పట్టుకు చేరేలోపే మత్తెక్కి కూలుతున్నాయి మధుపాలు' అనే వాక్యం రాసినప్పుడు రామాయణ వర్ణన నాకు తెలియదు. కానీ ఆ వర్ణన చదివినప్పుడు, నాకు కూడా ఇటువంటి ఊహ కలిగినందుకు నాకెంత సంతోషం కలిగిందో చెప్పలేను.
అది మా ఇంట్లో మొదటి కులాంతర వివాహం. మా నాన్నగారికి తెలిస్తే అడ్డుపెట్టి ఉండకపోవచ్చు ఏమో కానీ అంగీకరించకపోయి ఉండవచ్చు కూడా. అందుకని మా అక్క మా నాన్నగారికి చెప్పకుండా తనే దగ్గరుండి ఆ పెళ్లి చేయించింది. ఆ పెళ్లి నేను నా జీవితంలో చూసిన వివాహ వేడుకల్లో అత్యంత ఆదర్శవంతమైన వివాహ వేడుక.
