chinaveerabhadrudu.in
ఈ కాయం 'ప్రసాది కాయం' అంటే భగవంతుడి ప్రసాదంగా లభించింది, దీన్ని నిరసించడంగాని, శుష్కింపచెయ్యడంగాని బసవన్నకి సమ్మతం కాదు. కాని ఈ కాయాన్ని దాసోహంకోసం, శివసంఘం కోసం వినియోగించాలన్నది ఆయన పెట్టిన షరతు. కాబట్టి లింగం ఒక లక్షణ భావన. జంగముడు ఒక లక్ష్య భావన.
ఎన్నో వందల ఏళ్ళ తరువాత గాంధీగారు కూడా ఇదే అభిప్రాయానికి చేరుకున్నారు. కాని ఆయన తన జీవితకాలంలో తననొక నేతపనివాడుగా చెప్పుకున్నారు. మరొక జన్మంటూ ఉంటే ఆ జన్మలో తాను దళితుడిగా పుట్టాలని కోరుకుంటున్నట్టుగా చెప్పారు. కాని ఎనిమిది వందల ఏళ్ళకి ముందే బసవన్న తన జీవితకాలంలోనే తాను మానసికంగా దళితుడిగా మారగలిగాడు.
భారతీయ సామాజిక చరిత్రలో ఇలా ఆత్మ వంచననీ, కాపట్యాన్నీ దుమ్మెత్తిపోసినవాళ్ళల్లో బసవన్ననే మొదటివాడని గమనిస్తే, పన్నెండో శతాబ్దంలోనే అటువంటి నిరసన ప్రకటించడంలోని నిజాయితీ, నిర్భీతీ మనల్ని ఆశ్చర్యానికి గురిచేస్తాయి. అటువంటి మానవుణ్ణి ఆరాధించకుండా ఉండలేమనిపిస్తుంది
