chinaveerabhadrudu.in
అటువంటి ప్రణాళిక ఆదివాసుల విద్య గురించి ప్రపంచంలోనే అంతదాకా రూపొందించబడలేదు. భారతదేశంలో అంత విస్తృతమైన జనసంఖ్యకి అంత సమగ్ర ప్రణాళిక అంతదాకా ఏ ప్రాంతానికీ రూపొందించబడలేదు. ఆ సవివర ప్రణాళిక తమ చేతికందగానే చిన్నపాటి సవరణ కూడా కోరకుండా ఐఫాడ్ యాజమాన్యం దాన్ని యథాతథంగా ఆమోదించింది.
ఇది నేను ఊహించని అవకాశం. బహుశా హైదరాబాద్ వచ్చినప్పటినుంచి అంతదాకా నేను చూస్తూ వచ్చిన పాఠశాలలూ, హాజరయిన శిక్షణాశిబిరాలూ, డా.సుజాత ఇచ్చిన అవకాశాలూ, జాయ్పుల్లెర్నింగ్ కార్యక్రమం అన్నీ నన్నీ ప్రణాళికా రచనకు సంసిద్ధుణ్ణి చేయడానికీ, అందుకు అవసరమైన సామర్ధ్యాన్ని ఇవ్వడానికీ సంభవించిన అవకాశాలే అనిపించింది.
నేను విద్యాప్రణాళికను రూపొందించి దాని అమలును సమీక్షించినప్పుడు కేంద్రీకృత వైఖరిని అవలంబిస్తున్నానని నన్ను ఉత్నూరు నుంచి బదిలీ చేసేదాకా చాలామంది విశ్రమించలేదు. తీరా చేసి నేను పాడేరులో వికేంద్రీకరణ దిశగా, విస్తృత గ్రామ సమాజాన్ని పాఠశాలల నిర్వహణలో భాగస్వామిగా చేయడానికి ప్రయత్నిస్తున్నప్పుడు కూడా నాకు ప్రతిఘటన తప్పలేదు.