జయగీతాలు-15

ప్రభూ, ఎన్నటికీ నిలిచి ఉండే నీ ప్రేమ, నీ న్యాయం

వీటి గురించే పాడతాను, ప్రభూ, సంగీతం కూర్చుకుంటాను

నిష్కళంకమైన నీ మార్గం గురించి తలపోస్తాను

ఓహ్! ఏ నడిరేయి ప్రభూ నువ్వు నన్ను చేరవచ్చేది?

నా ఇంట్లో సత్యసంధతతో సంచరిస్తాను

వ్యర్థవిషయాలవైపు

మనసుపోనివ్వను.

నీ దారిని వదిలిపెట్టినవాళ్ళ చేతల్ని ద్వేషిస్తాను

అవి నన్ను అంటకుండా చూసుకుంటాను.

కుటిల హృదయానికీ నాకూ మధ్య ఎంతో దూరం

చెడు నాకు అపరిచితం.

ఎవరు విశ్వాసాన్ని నమ్ముకుని ఉన్నారో వాళ్లని ఆదరిస్తాను

వాళ్ళని నాతోనే ఉండనిస్తాను.

ఎవరూ వేలెత్తిచూపలేని విధంగా ఎవరు నడుచుకుంటారో

అతడే నాకు పరిచారకుడు.

మోసకారిజీవితం జీవించేవాడికి

నా ఇంట్లో తావులేదు

అబద్ధాలాడటం ఎవరికి చాతకాదో

వాళ్ళమీదనే నా కటాక్షం.

ఈ భూమ్మీద చెడ్డవాళ్ళందరినీ

దినందినం సంహరిస్తూంటాను

దైవనగరంలో దుష్టకర్మలు

చేసేవాళ్ళని తుడిచిపెట్టేస్తాను.

ప్రభువు నా ప్రభువుతో చెప్తున్నాడు

నీ శత్రువులందర్నీ నీకు పాదాక్రాంతం చేసేదాకా

నువ్వు నా కుడిపక్కనకూచో.

నీ రాజదండాన్ని పంపించాడు

ప్రభువు తన దేవాలయం నుంచి

శత్రుమధ్యంలోనే పాలనసాగించు

దివ్యవస్త్రధారివైన

నీ బలోత్సేకానికి

నీ ప్రజలు తమంతతామే తలొగ్గుతారు

ప్రభాతగర్భం నుండి విడివడి
హిమశోభిత యవ్వనం నీదవుతుంది

ప్రభువు ఒకసారి వాగ్దానం చేసాక

వెనుతిరగడు

నీ పురాతన వంశంలో

నువ్వు సదా దైవసేవకుడిగా జీవిస్తావు

ప్రభువుని స్తుతించండి

భగవంతుడికి భయపడేవాడు ధన్యుడు

ఆయన ఆజ్ఞల్ని హృదయానికి హత్తుకునేవాడు ధన్యుడు

అతడి సంతతి చిరకాలం వర్ధిల్లుతారు

నీతిమంతుడైన వాడు నిజంగా ధన్యుడు

అతడి గృహం సుసంపన్నం,  ఐశ్వర్యమయం,

అతడి సత్యసంధత శాశ్వతం

నీతిమతుడికోసం చీకట్లో వెలుగు ఉదయిస్తుంది

అతడు కృపామయుడు, దయామయుడు, ధర్మపరుడు

తోటిమనుషుల్తో ఉదారంగా ఇచ్చిపుచ్చుకునే వాడికి

తన పనులు నిజాయితీతో చేసుకునేవాడికి అంతా శుభమే.

సత్యవంతుడు చెక్కుచెదరడు

అతడు సదా స్మరణీయుడు

ఏ చెడ్డవార్త అతణ్ణి భయపెట్టలేదు

దేవుడిలో విశ్వాసం అతణ్ణి దృఢంగా ఉంంచుతుంది

తన శత్రువుల మీద విజయం సాధించి చిరునవ్వగలడు

తనకున్నదంతా ఉదారంగా బీదసాదలకు పంచిపెడతాడు

అతడి నీతివర్తన తిరుగులేనిది

అతడి విజయవాద్యం అడ్డులేనిది

దుర్మార్గుడు అది చూస్తాడు, పళ్ళు కొరుక్కుంటాడు

కోపగిస్తాడు, కనబడకుండా జారిపోతాడు

దుర్జనుల సంకల్పాలు ధ్వంసమైపోవుగాక!

స్తుతించండి ప్రభువుని!

ఓ ప్రభు సేవకులారా, ఎలుగెత్తి స్తుతించండి

భగవన్నామ సంకీర్తన చెయ్యండి.

ఆయన దుమ్ములోంచి బీదల్ని ఉద్ధరించగలడు

భస్మరాశుల్లోంచి ఆర్తుల్ని పైకి లేపగలడు

తన ప్రజానీకపు రాకుమారులసరసన

వారిని కూర్చుండబెట్టగలడు.

పిల్లల్లేని స్త్రీకి ఆయన ఆశ్రయం చూపగలడు

ఆమె చుట్టూ పసిపిల్లల కేరింతలు నింపగలడు

స్తుతించండి ప్రభువుని!

పరాయి భాష మాట్లాడే ప్రజలనుంచి,

ఈజిప్టు నుంచి నా దేశం విడుదలయినప్పుడు

ఒక ప్రాంతం ఆయనకు ఆశ్రయంగా అమిరింది

మరొక ప్రాంతం రాజ్యంగా విలసిల్లింది.

ఏమైంది, మహాసాగరమా, ఎందుకు పారిపోయావు

యోర్దాను ప్రవాహమా? ఎందుకు వెనుదిరిగావు

పర్వతాల్లారా, పోట్టేళ్లలాగా ఎందుకు తుళ్ళిపడ్డారు

కొండల్లారా, గొర్రెపిల్లల్లాగా ఎందుకు గెంతులేసారు?

నా దేశాన్ని కాపాడే నా దైవసన్నిధిలో

నా ప్రభు సమక్షంలో, భూమండలమా, కంపించు

ఆయన గండశిలల్ని సరోవరాలుగా మార్చగలడు

చెకుముకిరాళ్ళతో సెలయేళ్ళు పుట్టించగలడు.