chinaveerabhadrudu.in
ఈ కవితలు బాలాజీ శిశుహృదయంతో రాసాడు కాబట్టే ఇందులో అధికభాగం కవితలు, అమ్మ గురించీ, తన పిల్లల అమ్మ గురించీ, తనకి అమ్మగా మారిన తన పిల్లల గురించీ ఉండటంలో ఆశ్చర్యం లేదు. స్త్రీల గురించీ, తనని కడుపులో పెట్టుకుని చూసుకున్న తన తల్లి, సహచరి, కూతురుల గురించి కవి మాట్లాడినప్పుడల్లా మన హృదయంలో కూడా ఒక తంత్రి మృదుమధురంగా మోగడం మనకి వినబడుతుంది.
ఈ పుస్తకం వెలువడ్డ ఇన్నేళ్ళ తరువాత కూడా ఒక కవి, ఒక భావుకుడు ఈ పుస్తకం మీద ఇంత సంతోషంతో నాలుగు మాటలు రాయడం నన్ను ఆశ్చర్యపరిచింది. అందుకని పలమనేరు బాలాజి రాసిన ఈ సమీక్ష మీతో పంచుకోవాలనిపించింది. దాంతో పాటే, ఆ పుస్తకం పిడిఎఫ్ కూడా మరోసారి.
కామించి కోరితే కరుణ కురిపించిన కరుణాసముద్రుడు కాబట్టే ఆయన్ని అన్నమయ్య కోనేటి రాయుడని పిలిచి ఉంటాడు. అదీకాక కొండలరాయడు అనడం స్వభావోక్తి. కొండలలో నెలకొన్న కోనేటిరాయడం అనడంలోనే కదా కవిత్వముంది!
