తెల్లవారి లేస్తూనే హాల్లోకి వచ్చి నిలబడేటప్పటికి
ఎదట వీథినంతా హాలుగా మార్చేసి కానుగచెట్టు.
నునువెచ్చని నీడల పరదాల్ని పొందిగ్గా మడిచిపెట్టి
అతిథుల్ని ఆహ్వానిస్తూ తలుపులు తెరిచిపెడుతుంది.
ఆ ఆకుపచ్చని గుబుర్లనిండా తాజా పరిమళం.
చూడబోతే చెట్టు బర్త్ డే కేక్ సిద్ధం చేస్తున్నట్టుంది.
అరేబియా కథలోలాగా నా పొరుగువాడు రొట్టెలు
చేసుకుంటూ ఉంటే ఆ సువాసన నాకు దక్కుతుంది.
ఇంతలో ఊదారంగు తెల్లని మొగ్గలు చిరుగంటలు
మోగిస్తూ హాపీ బర్త్ డే పాట మొదలుపెడతాయి.
ఫలానా అని పేరు చెప్పలేవు గానీ ఆ క్షణాన నీకు
గుర్తొచ్చేవాళ్ళంతా అక్కడికొచ్చినట్టే అనిపిస్తుంది.
11-3-2025
మొగ్గలు చిరుగంటలు మోగించడం.. ఎంత అందమైన అభివ్యక్తి.. వేటూరి వారి. . పున్నాగ పూలు సన్నాయి పాడింది అన్నారు.. ఇప్పుడు నేను ఆ పూలని ఎక్కడ చూసినా.. ఆ పువ్వుల ఆకారం అలాగే అనిపిస్తుంది.. చిన్న షహానాయి కూడా వినిపిస్తుంది . అలాగే ఇక మీదట ఎప్పుడు కానుగ పూల మొగ్గలని తలచుకున్నా చిరుగంటల్లాగే మోగుతాయిమో. ప్రకృతి లోని ఆకృతి లలో కళ్ళకి కూడా శ్రవణ శక్తి తెప్పించే ఎన్ని కృతులో…
ధన్యవాదాలు సార్!
హృద్యమైన అనుభూత్యాత్మక పద్యం.
ధన్యవాదాలు సార్
ఇది నేను రాయవలసిన కవిత….ఈ పూలని చూస్తే, అసలు ఈ మాసం వస్తుందంటేనే గుర్తొచ్చే కవి మీరు. ఆ ఆఖరు వాక్యాలు నావీ 😢
మీలోని కవికి మళ్ళీ మళ్ళీ ❤️❤️
పొద్దుణ్ణుంచీ ఎదురు చూస్తున్నాను ఈ మాటల కోసం.