chinaveerabhadrudu.in
పట్టుమని వందపేజీలు కూడా లేని ఈ పుస్తకంలో 'పూల ప్రజ్ఞానం' తో పాటు, పరిమళం మీద కూడా ఒక వ్యాసం ఉంది. రెండింటిలోనూ మాటర్లింక్ రాసింది సైన్సు కాదు. కవిత్వం. కానీ పూలనీ, పూల సుగంధాన్నీ ఒక శాస్త్రజ్ఞుడిగా పరిశీలించాక పుట్టిన కవిత్వం అది. ఇంకా చెప్పాలంటే, అతడిలోని శాస్త్రజ్ఞుడివల్ల అతడిలోని కవి అదృశ్యం కాకపోగా, మరింత బలం పుంజుకున్నాడన్నమాట.
ఆధునిక మానవుడు స్వభావరీత్యా Faustian. కానీ, ఆ సంక్షుభిత, సందిగ్ధ మానవుడి అంతరంగంలో ఒక lyrical మానవుడున్నాడని గొథేని చదివితేనే అర్థమవుతుంది. అందుకనే గొథే రచనలన్నీ అదృశ్యమయినా కూడా ఆయన గీతాలొక్కటీ చాలు, ఆయన్ని మహాకవిగా గుర్తించడానికి అన్నారు విమర్శకులు.
లోరెలీ జర్మన్లో రైన్ నది ఒడ్డున ఉన్న ఒక నిటారు పర్వతశిఖరం. మర్మరమంగా ధ్వనించే శిఖరం అని దాని అర్థం. ఆ కొండ పక్కన ఆ నదిలో ఎన్నో నావలు సుడిగుండంలో చిక్కుకుని మునిగిపోయాయి. ఆ కొండమీద ఒక సుందరి ఉండి పాటలు పాడుతూ ఉంటుందనీ, పడవనడిపే వాళ్ళు ఆ పాట వింటూ దారితప్పి మరణిస్తుంటారనీ స్థానిక కథనం.
