మనసున మనసై

పదేళ్ళ కిందట, ఒక మిత్రుడు వాళ్ళబ్బాయి పెళ్ళి సందర్భంగా, అతిథులకి ఇవ్వడానికి ఏదేనా పుస్తకం ఒకటి డిజైను చేసిమ్మని అడిగాడు. తనదగ్గర బాపు బొమ్మలు కొన్ని ఉన్నాయని కూడా చెప్పాడు. అప్పుడు ‘మనసున మనసై: భారతీయ కవులూ, వారి హృదయేశ్వరులూ’ అనే పుస్తకం రూపొందించాను. నా మిత్రుడు తనదగ్గరున్న బాపు బొమ్మల్ని ఆ కవితలకు తగ్గట్టుగా ఉపయోగించుకున్నాడు.

అయితే అది పెళ్ళికానుక కాబట్టి విస్తృతపాఠకలోకానికి అందుబాటులో లేకుండా ఉండిపోయింది. అదీ కాక, ఆ పుస్తకం ఎ-4 సైజులో ఉండటంతో అది పాఠకసన్నిహితం కాదు. అందుకని ఆ పుస్తకాన్ని ఇప్పుడిలాగ ఎ-5 సైజులో రీడిజైను చేసి మీతో పంచుకుంటున్నాను. మహత్తరమైన భారతీయ మీనియేచర్లనుండీ, భారతీయ శిల్పాల నుండీ, అజంతా చిత్రలేఖనాలనుండీ, అవనీంద్రుడు, రవీంద్రుడూ, అమృత షెర్-గిల్, అబ్దుర్ రహమాన్ చుగ్తాయి వంటివారి చిత్రలేఖనాల నుండీ ఎంపిక చేసిన బొమ్మల్ని ఆయా కవితలకు తగ్గట్టుగా పొందుపరిచాను.

ఇస్మాయిలు గారు ఉండి ఉంటే ఈ పుస్తకానికి ఆయనతో ఒక ముందుమాట రాయించుకుని ఉండేవాణ్ణి. ఇప్పుడు ఆ లోటు ఎవరు పూరించగలరా అని ఆలోచిస్తే మానస చామర్తి కనిపించారు. ఆమె ‘ప్రేమ మంత్ర మహోపాసన’ అని రాసిన సమీక్ష ఈ పుస్తకానికి తలమానికం.

ఈ పుస్తకాన్నిక్కడ డౌనులోడు చేసుకోవచ్చు. మీ మిత్రులకు కానుకగా పంపుకోవచ్చు.

9-7-2025