chinaveerabhadrudu.in
అందుకనే, ఒక్కసారన్నా ఆరుబయటకు పోయి బొమ్మలు వెయ్యాలని ప్రతి రోజూ అనిపిస్తూంటుంది. అలాగని నేనొక గొప్ప చిత్రకారుణ్ణని కాదు. అలా బయటకి పోయి నా ఎదట కనిపిస్తున్న దృశ్యాన్ని నాకై నేను వ్యాఖ్యానించుకోవడంలో నా మటుకు నాకొక ప్రార్థనలాగా అనిపిస్తుంది.
చిత్రలేఖనం నేర్చుకోవాలనుకునేవారికి స్టిల్ లైఫ్ చిత్రలేఖనం గొప్ప అభ్యాసం. అందులో తలమునకలయ్యేవారికి అదొక గొప్ప సవాలు. ఆ సవాలును స్వీకరించేవారు చాలా అరుదుగా ఉంటారు. అటువంటి అరుదైన చిత్రలేఖకుల కోవలో కిరణ్ కుమారి ముందు వరసలో ఉంటారు.
యూరోప్ లో అయినా, ప్రాచీన చైనా లో అయినా, చిత్రకారులు కావాలనుకునేవాళ్ళకి పూర్వ చిత్రకారుల కృతుల్ని అనుకరించడమే మొదటి సాధనా, ముఖ్యసాధనా కూడా. ఆ చిత్రకారులు తమదైన సొంత గొంతు వెతుక్కున్నాక కూడా పూర్వచిత్రకారుల మీద గౌరవంతోటో, వాళ్ళ కొన్ని చిత్రాల పట్ల పట్టలేని మోహంతోనో వాటిని తాము మళ్ళా చిత్రిస్తూండటం పరిపాటి.