chinaveerabhadrudu.in
బసవపురాణంలో ముగ్ధభక్తుల కథల గురించి చేస్తూ వచ్చిన ప్రసంగాలకు కొనసాగింపుగా ఇవాళ బసవణ్ణ భక్తి గురించిన ప్రసంగం.. బసవణ్ణది ముగ్ధభక్తి కూడా. ముగ్ధభక్తులు శబ్దప్రమాణాన్నే విశ్వసించి నడుచుకున్నారు. పెద్దలు శివుడి గురించి ఏ మాట చెప్తే ఆ మాటనే వాళ్ళు శిరోధార్యం చేసుకున్నారు. బసవణ్ణ కూడా అలానే తన గురువు సంగమయ్య తనకు చేసిన ఉపదేశానికి అనుగుణంగానే తన నడవడికను, తన వాక్కుని రెండింటినీ తీర్చిదిద్దుకున్నాడని బసవపురాణం చెప్తున్నది. ఆ విశేషాలు ఈ రోజు ప్రసంగం.
ముగ్ధత్వం మనందరం మన జీవితాల్లో ఏదో ఒక సందర్భంలో అనుభవించే ఉంటాం. కాని అది మనకి క్షణకాలపు అనుభవంగా మాత్రమే ఉండి ఇంతలోనే మన రోజువారీ మెలకువల్లో పడగానే కలలాగా కరిగిపోతుంది. కాని ముగ్ధభక్తులకి అది జీవితసారాంశం.
తెలుగు పాఠకుల్లో కూడా చాలామందికి రూమీ గురించి తెలిసినంతగా సోమన గురించి తెలియదు. కాని కావ్యనిర్మాణ పద్ధతుల్లోగాని, కథనశైలిలోగాని, ఈశ్వరదర్శనం ఏ కొద్దిమంది పండితులకో కాకుండా ప్రజలందరికీ సుసాధ్యమేనని నమ్మడంలోనూ, చెప్పడంలోనూ కూడా సోమన, రూమీ ఒక్కలాంటివారేనని చెప్పడం ఈ రోజు ప్రసంగం ముఖ్యోద్దేశం.