ఆయన వెంట నడుస్తూనే ఉన్నాను

బృహస్పతి: ఇతరుల జీవితంలో నీతి, దుర్నీతుల్ని నిర్నయించే న్యాయాధికార పీఠానికి నిన్ను అభిషిక్తుణ్ణి చేసిందెవరు? ఆ విచక్షణ నీ జీవితాన్ని దిద్దుకునేందుకు వుపయోగపడాలి. లోకాన్ని దిద్దేందుకు కాదు.

…..

గౌతముడు: ఆత్మాభివృద్ధికోసం, ధర్మబోధనకై-

 

బృహస్పతి: (చాలా emotion తో) గౌతమా, అజ్ఞానంతో, దుర్బలత్వంతో, మూర్ఖంతో సమస్త రోగ యీతిబాధలూ లోనై కర్మవశాన జరామరణాదులనించి విముక్తిగానక, అంధకారంలో మూల్గే ఈ ప్రాణికోటికంతా ధర్మబోధన చేస్తావా? గౌతమా, వారి ఆత్మాభివృద్ధి చెయ్యాలనే సంకల్పం వాస్తవంగా నీకుందా? వుంటే ప్రేమించు. సమస్తజీవుల్నీ ప్రేమించి, నీ కన్న, నీ తపస్సుకన్న, నీ భార్యకన్న, నీ యీశ్వరుడి కన్న, అధికంగా దుర్గతిలో పెనుగులాడే యీ లోకాన్నంతా ప్రేమించు. కల్మషమంతటితోనూ, యీ ప్రపంచాన్ని నీ హృదయానికద్దుకో. పాపంలో మునిగినకొద్దీ, అంధకారంలో జారినకొద్దీ, నీ చేతుల్ని యింకా కిందికి చాచి, హృదయానికింకా దగ్గరగా హత్తుకో, ఖండించకు, శిక్షించకు-

 

గౌతముడు: వారి కర్మానుసరణంగా జీవులు అనుభవిస్తారు. మనమేం చెయ్యగలం?

బృహస్పతి: నిజం, యేమీ చెయ్యలేము. ఈశ్వరుడికే లేదు ఆ శక్తి. నిస్సహాయులము. ప్రేమిచగలము. అంతే!

 

గౌతముడు: ప్రేమించి-ఏమిటి లాభం?

 

భారాలన్నీ మోయ సమర్థుడైన ప్రభువు హస్తాల్లో

సమస్తమూ వొదులు

పశ్చాత్తాపంతో వెనక్కి చూడకు.

 

తన శ్వాసతో తాకిన దివ్వెనుంచి

వెలుగుని ఆర్పేస్తుంది నీ కాంక్ష.

 

అపవిత్రమైన దాని హస్తాలతో

ఏ కాన్కనీ అంగీకరించకు.

 

నీకు చోటు చెయ్యడానికి, ఎవరినీ పక్కకి

వొత్తిగించనక్కర్లేదు. ప్రేమ నీ కోసం ఆసనాన్ని

సిద్ధం చేసిందంటే, అందరికీ చోటు చేసిందన్నమాట.