శివతాండవం

కలమళ్ళ నుంచి పొద్దుటూరు చేరేటప్పటికి నడిమధ్యాహ్నం కావొస్తూంది. నేను రెండింటికల్లా పీలేరు చేరుకోవాలి. కాబట్టి పొద్దుటూరు పట్టణంలో నాలుగు రోడ్ల కూడలి దగ్గర ఉన్న పుట్టపర్తి నారాయణాచార్యులుగారి విగ్రహానికి పూలమాల వేసి వెళ్ళిపోదామనుకున్నాను. మేము పొద్దుటూరు చేరుకునేటప్పటికే ఆ సెంటరులో చాలామంది మిత్రులు మా కోసం వేచి ఉండి మాకు స్వాగతం పలికారు. వారిలో నరాల రామారెడ్డిగారు కూడా ఉండటం నాకు ఆశ్చర్యం కలిగించింది. అంతటి మహాపండితుడు, అవధాని నా కోసం వచ్చారని తెలియడం నాకెంతో సంతోషాన్ని కలిగించింది.